Od pete ure na šparketu skraja lonac sarme tuinja. Svaka gazdarica zna ča to znači. Znači da se digla u četri jer jutro puno nosi i divani.
Gospodar još spi, dičica isto a i svekrva ,bog joj dal zdravlje, u snu se nesnila, rče.
Bez plana nema dana, rekli bi stari ljudi pa je svaka gazdarica ma i na s livon rukon razradila ča će. Najprije izmeti kuću isporavi slamu u rešeto, pripravi za šikalce orijov i ne dvi sakrivene narandže. Odlji politricu rakije za ljude, sebi sa strane pripravi čokančić za ne momente kad te svekrva najadi i gospodar presiče.
Ako do danaske nisi ča spekla potrudi se zadnja je ura. Jerbo kad se svi podižedu i zatraži svak svoje past ćeš s nog.
Gospodar će se uvatit ognja i pečenke pa bolje da si vajk na oku jer kad zagalami u kuvariji, trkni man more bit se izvrnula pečenkica (ni prvi put) pa da spašavaš.
I dva kruva i oriovnica i mali kruščić za pod sviću, i borić nariktat i još sve malko popickat, sve ti je to u rukami danas.
Muškina i čestitari sa nin blatnim čižman kad počmedu tancat po kuhinji šlag te vata, al potrpi jer vaj dan ti ni od ženskoga divana već od posla i iz dvorišća danas neš.
Računaj da ćeš prednoć zaligat gospodara jer se nagutal i dima i rakije i dobro pazi da se kuvarija zaključa prije mraka.
Ako to još sve projde bez svađe i galame bogu zafali, prekriži se, jer siti se lani kad je borić frcal kroz vrata van jer se gospodar malo potrknul … Zato ne izazivaj, divani sebi u bradu, a svekrvu žbocni nasamo nek se malo prži.
Jerbo će ti ona svakako reć … “a Badnjak je jedan dan u godini, valjda moreš potegnut kad si vi dani ležala”.
Nasmij se i odmani rukon, pripravljaš za Isusića maloga mesto, a on nigdar nikoga ni zaboravil, pa neće ni tebe, pa ćeš božićevat s miron u srcu i duši.
Autor: Nada Rogić, 24.12. 2024.
