Snižić je danas zasul selo. Nako kaj koda se paučina provukla po dvorišćima i krovima, pa dršće i kaj da se malo i boji jer zericu sunca otaplja je i jopet se izgubi nebeska lipota. A vako moja Skela posuta snigon baca kaj da je neki prosijal brašno odozgora da zakuva nešto upreško bez nadiževanja jer vremena ni puno.
Zaspale su šljvice i svakojake voćkice po selu, grane in se ukorile i štrčidu uzbrdo kaj da nekoga i strašidu, a znan da plačedu za mekanin liščen i kon ptičicon. Bašće su utonule i grijedu se na ognju iz dubine, pušćidu u se još samo kakovoga mrava ili bubu da se zavuče i prezimi. I taman kad se sve zasivilo i zacrnilo i spremilo na počinak, posijal Bog snig uretko pa Skela dobila retku lipotu.
Iz svake treće kuće dimi. A ki bi reklal da ću nekad i za dimnjakon pušćat suzu. Sve je manju ruk ostalo za složit vatru i sve je manje prozorov ki naveče svitlidu. Moredu se prebrojit na prste edne ruke, a znamo da nam je Bog dal dvi ruke da š njima stvaramo, a ne s ednon, s ednon je sve teže i napol. A napol ni celo.
Takova moja napol slomljena Skela jutros pod snigon osvanula kaj raj na zemlji i načas mi se učinilo da ceston vidin da teta Marijana puše u prste i sitno korača kroz Jezerac, da je teta Marica rano naložila i skuvala kafu jer oko devet dolazidu komšije na divane. Pogledan nizbrdo prema raskrižju, a narod se uzvrzml gori doli, mliko se predalo pa svaka žena sa svojon kanton kriće kući, a splele se i mačke ča i je miris mlika sabral na vrpu. Stric Tone prošal s auton na Dom ča oće reć da je prošla osma ura i da je dan i za najlenije krenul. Mater ronda po konobi, razotkrla kacu i vadi zelje pa miriši cela kuća. Ćako sidi za stolon i bili jabuku pa kroz razmaknute firange nadgleda cestu i čeka ki će s Doma donest nekakove novice.
– Mama, mama … zazva me poznati glas moga diteta. Al čekaj sad, ako mene moje dite sad saziva, di su onda moja mater i moj ćako, di je nestal miris zelja i zač šparket ne grije i ki ga je pokrl stolnjakon, di je skrenula teta Marijana, zač se stric Tone ne vraća s Doma… E ča se dogodilo? Pogledan jopet prema raskrižju, nema nigdi žive duše. Esan li ja to na tren usanjala? I lice mi se skroz zbunilo, kaj da bi se nasmijalo, a kaj da bi spušćalo suzu. Zaslipilo me sunce, škilji pravo od Nišića, pa sam zaklopila oči kaj da još ostanen u nome jutru kad smo ja i moja Skela bile edno.
Paučina od sniga se istopila, pa je Skela jopet napol, a skupa sa snigon istopil se moj san, al samo izvana, jer ki njega more istopit u mome srcu. Niki. Ni kad bi se baš zaintačil, nemore.
Ni da projden neznan kud po svitu, san o Skeli i ljudima ostat će vajk smanon, i svaki snižić izmamit će jopet i suzu i zafalnost za edan del života ča se danaske pretvoril u san.
(12. 12. 2021.)
Nada Rogić 
Foto: Viktorija Cvitkovic
